Entrada libra!
Hoz es ün di special. Il circus vain! Blers vaguns cun bes-chas e material viagian fin sül grond prà immez cumün. Pac plü tard es l’immensa tenda be culuors in pè. Las artistas e’ls artists exerciteschan cun gronda concentraziun. Prunas da placats intimeschan a la glieud dad ir a las rapreschantaziuns. Fingià la saira davo sun tuots pronts per la prüma rapreschantaziun. Però gnanc’orma nu para d’avair interess. Il directur dal circus squassa il cheu: «Co pudessa be implir mia tenda?» Eir cun sbassar ils predschs d’entrada nu ragiundscha’l il resultat giavüschà. «Che pudessa be far?», as dumonda’l tuot desperà. Dandettamaing ha’l ün’idea grondiusa. El lascha surtachar tuot ils placats Cun quai ha’l success! I vain üna pruna glieud da tuot las etats. Davo pac mumaint es la tenda stachida. Illa rapreschantaziun segua üna culminaziun a tschella. Il clown culs culombs es pels aspectatuors üna gronda surpraisa. Tuot chi ria da sias chotschas massa cuortas. La plü gronda surpraisa es però il kenguru chi dà puogns – dafatta a seis domptur bütta’l per terra be da pais. Davo la rapreschantaziun tuot chi va vers la sortida. Là es però il directur cun seis kenguru chi porta amo adüna sias manetschas da puognar. Daspera es fixada üna tabla cun sü:
«Entrada libra – Sortida 7.– fr.»
Tuots pajan, sainza excepziun!
